| Notes |
- 12 oktober 1571:
Gerdt Ekinck und Alidt sin huisfrowe, mit Gerden
vurs. oren man und mombar, hebben uth bewegenden
oirsaicken und oren wal voirbedachten beraidt und friën
willen oren sonn Gerdt Ekinck uth der handt upgedra-
gen und avergegeven, holderen und besitteren gemackt
des erff und gudes Ekinck, als dat mit sinen alingen
olden und nhien tobehoir gelegen is in den kerspel Alten,
in der buirschap Iserlo. Und hebben desselvigen uthge-
gaen und mit handt, halm und monde vertegen als recht
is. Mede gelaeft voir on und oren erven gelaeft deser
updracht und avergift alle tidt gude uprechte warschap
to sin und noch vorder und better vesteniss, dairmit
Gerdt vurs. oir son to rechte bestaen, wall verwaret
und bevestiget sin und bliven tegens all dengennnen
die des to rechte komen off mit recht besprecken und
indracht doen off maicken willen. Des sall hirentegens
Gert die sonne vurs. schuldich und gehalden sin Gert und
Alidt, eeluiden vurs., hoir leven lanck bij sich in dem
huise to halden, kost, cleder und alle notdroft in gesunt-
heit und kranckheit to bestellen und to verschaffen.
Und so dairin feill oder mangel geschege, sall dese
updracht und avergift van onwerden sin. Sonder argelist.
Item Gert, die sonne, sall ock sinen twen susteren, Nalen
und Trinen, als die to bestade komen van den erff
und gude Ekinck, geven und vernogen elck twehondert
dalers und dairto naburliche uthreidungh gelick den
twen oldesten susteren geschiet, dairmit sie van den
erf und gude Ekinck uthgegudet und afgesatt sin und
bliven sollen. Item die oldeste dochter Stine
heft anderhalf hondert dalers und uthreidungh ontfan-
gen und sall dairto to noch viftich dalers hebben, dair-
mit sie ock van denselven vurs.gude afgaen und
uthgegudiget sin und bliven sall. So heft ock
die anderde dochter Geesken twehondert dalers und
hoir uthreidungh ontfangen, dairmit sie ock van den
vurs. erff und guidt Ekinck afgegudet und afgesatt
sin und bliven sall. Und so ennich van den onbesta-
deden susteren sonder liefserven verstorven, sall
hoir vurs. deputierde andeill van dat guidt Ekinck up
oir susteren of derselver erven fallen. Und is Gerdes
und Alitz vurs. uterste wille dat die vurs. dochteren
ditsolff als vurs. steitt sollen halden und sich dairmit
genogen laten.
Bron: ADW (transcriptie) judicieel protocol 1571-1572, ORA Bvt inv.nr. 50 fol. 80v
|
Achterhoek Ancestors
