| Notes |
- 14 april 1625:
Erschenen Peter Cloeck eens, und Claes und Anna Cloeck, broeder und suster sijns Peters bij sijner zal. huijsfrouwen Elssken van Loon getuigte echte Kinder mit Bernt van Trier und Margrieten van Loon eheluijden, haren Oom, Moeije und hiertoe erkorenen und thoegelatenen Mombaren anderdeels, Die bekanden und Sie Claes und Anna vermitz authoriteit hares Ooms, Moeijen und Mombaren vorschreven, voer sich und haren erven, van wegen gemelter Kinder Moederlicken und respective derselven na haren dode affgestorvenen drien Kinderen Nalatenschaps, gereden und ongereiden goederen, schicht- und deijlongh geholden tehebben, In mathen navolgendt : Eerstlick sullen die Kinder tot haren ehelicher bestadung thoe Die Camer der behuijsongh daer tegenwoirdich Meister Henrick ten Harckel In woont, offt die huir daervan genieten, Nae eheliche bestadongh averst den gerechten Derdendeel der alinger harer olderlicke Behuisonghen, Hoffs und toebehoers binnen Bredeforth gelegen, erfflick erholden, Daer aver und van wegen partierong, und deijlong derselven Vader und Kinder sich alssdan verners sullen hebben tevergelijcken, Verners sullen Claes und Anna vorschreven erfflick erholden den kamp und den Moessgaerden daertendens voer Bredeforth, mit eener sijdt langs Predicants und Thijs Oirtmans Hoven, voort sijns Peters gaerden - den Pillen gaerden genant - mitter ander sijdt anden Voerwech langs Bernt van Triers Camp, voort desselven und sijns Peters Visscherie gelegen; Die Camp mit eenen ende ande gemeine strate, und die Moesshoff achter mit den halven Graven - hier toebehorende - an Peters Poll schietende, Noch den derdendeell vanden Hoff voer Bredeforth Inde Heeren Koppell langs den Dijck gelegen, offt wat daervan und voer sal staen t'erholden und genieten. Und dan twie koeweijden opt Swanenbroeck, Alle mit derselven toebehoer und gerechticheit. Aengaende die gereede gueder, Meublen und huijssgeraet, bekanden Vader und Kinder alles vermitz haren Oom, Moeije und Mombaren vorschreven dieselve onder haer gedeijlt, die Vader twie deele und die Kinder den derdendeel daer van ontfangen und in haer verwaer genomen te hebben. Und alssmen, nevens andere schulden, der Meijersche ten Borninckhave hondert Soevenundsestich daler, Lubbert Brussen Vijfftich Daler, und Bastiaen Crijchsman Vijff und dertich daler - staende t'samen te verpensioneren - und dannoch Crijchsman Vijfftich Daler - daervoer hij twie Koeweijden opt Swanenbroeck in pantschap hefft - noch schuldich is, Soe is verdragen und bescheijden, Dat die Kinder alsulcke Schulde, so an Hoefftsummen, als Pensionen van nu an verschijnende, dragen und affleggen sullen. Alle andere gueder gereide und ongereide, als oick alle andere des Sterffhuijses Lasten und schulden, soe Hoefftsummen als voer dato deses versetene und verschenene Pensionen hefft die Vader alleen aengenomen tedragen und t'entrichten. Lestlick is veraffscheijdet und bewilligt, Dat Imfall der Kinder eene sonder echte lijffs erven natelaten doodts verscheijden worde, alssdan het enne opt ander erven sulle, niet tegenstaende Zutphenschen Landtrechte. Daerop Peter vermitz desen vrijwillich vertegen. Und bekanden Parthien in qualiteit vorschreven, van wegen der Kinder Moederlicken sampt haren na haren dode affgestorvener Kinder Nalatenschap hiermit eens voer allen, liefflick, frundtlick, endtlick und onwederroeplick verdragen tesijn und blijven. Und sijn malkander deses alsoe reciproce gecediert und uthgegaen, daerop mit hant, halm und monde vertegen, waerschap und vestniss gelaefft nae Landtrechte, Sonder exception und argelist.
Bron: Franciska Ruessink (transcriptie): ORABvt inv.nr. 398 fol. 22-23v
|
Achterhoek Ancestors
