| Notes |
- 29 april 1534:
Wylhelma Meckinx, met Iserahell Ernstes horen gekoren ende thoeghelaeten momber, hefft overgegeven Ffrederick ende Annen, naghelatenen vuerkynderen salygen Sweder Rasehornss, alsoedane erve ende gueder, rede ende onrede, daer sie alss huesfrouw salygen Swederss vurs. vermitz synen doetlicken affganck mede beërvet mach syn gewest, nycht uitbescheyden.
Item, Dess synnen vorwerden ende iss bededynget tusschen Wylhelma vurs. ende dem momberen der kynder vurs., dat de momberen hoir ennss geven ende kommerffrij leveren ende betaelen sullen, tusschen Sant-Merten ende Kersmisse erstkomende, vyff ende dertig golt gulden off de gewerde. Item dem rynck, dem hoir salyghe Sweder gegeven hefft, sall sie oick behalden. Oick, soe eyn sylveren becker versat staet by Seyno van Welffelde, sult hoir de kynder ther stunt vrien ende then handen stellen. Oick iss belevet dat Wylhelma alle dessgoenss sy an salyghen Sweder ghebracht hefft, hetsy dan kleer, klenodij, huesraet, rackheit; voirtan all ander gueder, rede ende onrede, sall wederom met hoir uit dem huese trecken ende tot horen besten orber ende beleven gebruecken, bueten bekronen der kynder vurs.
Oick iss bededynget dat Wylhelma vurs. van salygen Swederss schulden, in't cleyn off groet, nicht overall betaelen sall.
In denselven gherichte hebben de momberss vurs., der weduen vurs. t'borghe gesat, Evert van Rede, die gelaefft hefft dat der weduen de 35 golt gulden op termynen vurs. sullen uitgericht ende betaelt worden. In ghelycken van den sylveren becker, dat hoir de oick then handen sall gestalt worden.
In denselven gherichte hebben gelaefft Reyncken Rasehorn ende Henrick, syn sonne, ende Johan ende Henrick them Toll, gebruder, dat sie Everde van Rede van alsodane loffte schadeloess halden wyllen.
Bron: ADW, ORA Bvt inv.nr. 34 fol. 73
|
Achterhoek Ancestors
